ადალატი SL
(NIFEDIPINE)
ფორმა, შეფუთვა: რაპიდ-რეტარდის შემოგარსული ტაბლეტები. ერთი ტაბლეტი შეიცავს 20 მგ აქტიურ ნივთიერებას. მუყაოს კოლოფში დევს 10-10-ტაბლეტიანი 3 ცალი ბლისტერი.
შემადგენლობა: ნიფედიპინი (NIFEDIPINE)
მწარმოებელი: АДАЛАТ СЛ (ADALAT SL) BAYER Healthcare, გერმანია
კლინიკურ-ფარმაკოლოგიური ჯგუფი: კალციუმის არხების ბლოკატორი
ფარმაკოლოგიური მოქმედება: ადალატის აქტიური ნივთიერება ნიფედიპინი არის კალციუმის ნელი არხების სელექციური ბლოკატორი დიჰიდროპირიდინის წარმოებულთა ჯგუფიდან. 1,4-დიჰიდროპირიდინის წარმოებული ახდენს ანტიანგინალურ და ჰიპოტენზიურ მოქმედებას, ამუხრუჭებს კალციუმის იონების ტრანსმემბრანულ მიწოდებას კარდიომიოციტების, გლუვი კუნთების უჯრედების, კორონარული და პერიფერიული არტერიების შიგნით, ამცირებს პერიფერიული სისხლძარღვების წინააღმდეგობის უნარს და აფართოებს კორონარულ არტერიებს, ძირითადად - მსხვილ სისხლძარღვებს. ნაწილობრივ - სტენოზირებულ სისხლძარღვთა კედლების ინტაქტურ უბნებს. ნიფედიპინის ზემოქმედებით მცირდება გლუვი კუნთოვანი ქსოვილისა და კორონარული არტერიების ტონუსი, ამის კვალობაზე, ფერხდება ანგიოსპაზმის განვითარება, ძლიერდება სისხლის ნაკადი სისხლძარღვთა პოსტსტენოზურ ნაწილში, პერიფერიულ სისხლძარღვთა წინააღმდეგობის შემცირების ხარჯზე უმჯობესდება გულის კუნთის ჟანგბადით მომარაგება. ხანგრძლივი გამოყენების შემთხვევაში ადალატს უნარი შესწევს, შეაფერხოს კორონარულ არტერიებში ათეროსკლეროზულ დაზიანებათა ჩამოყალიბება. ნიფედიპინის გავლენით მცირდება არტერიული წნევა, რაც არტერიოლების გლუვკუნთოვანი ქსოვილის ტონუსის შესუსტებით და, ამის კვალობაზე, პერიფერიულ სისხლძარღვთა წინააღმდეგობის შემცირებით არის განპირობებული. მკურნალობის საწყის ეტაპზე შესაძლოა დროებით მოიმატოს გულის შეკუმშვათა სიხშირემ და, ამის კვალობაზე, გულის წუთმოცულობამ, მაგრამ სისხლძარღვების გაფართოებაზე ეს გავლენას არ ახდენს. ნიფედიპინი აუმჯობესებს ორგანიზმიდან ნატრიუმის იონებისა და სითხის გამოდევნას. მას უნარი შესწევს, რეინოს სინდრომის დროს ხელი შეუშალოს სისხლძარღვთა სპაზმის განვითარებას.
ფარმაკოკინეტიკა: შინაგანი მიღების შემდეგ ნიფედიპინი სწრაფად და თითქმის მთლიანად შეიწოვება კუჭ-ნაწლავის ტრაქტის მიერ. მისი ბიოშეღწევადობა შეადგენს 45-56%-ს. საკვების მიღების შემთხვევაში შეწოვის სიჩქარე შესამჩნევად მცირდება, მაგრამ ბიოშეღწევადობა არ იცვლება. 20 მგ ადალატის მიღების შემთხვევაში სისხლის პლაზმაში პრეპარატის მაქსიმალური კონცენტრაცია მიიღწევა 1,6-3,6 საათში და შეადგენს 47-76 მგ/ლ-ს. ნიფედიპინის მეტაბოლიზება ხდება წვრილი ნაწლავის კედლებსა და ღვიძლში. წარმოიქმნება არააქტიური მეტაბოლიტები. ადალატის ნახევარდაშლის პერიოდი 3,7-3,4 საათს უტოლდება. ჩვეულებრივი დოზით მიღებისას კუმულაციურ ეფექტს არ ავლენს. მეტაბოლიტების უდიდესი ნაწილი თირკმელების საშუალებით გამოიყოფა, ხოლო 5-15% - ნაწლავების გავლით ნაღველთან ერთად. უცვლელი სახით ნიფედიპინი უმნიშვნელო ოდენობით არის შარდში. თირკმელთა ფუნქციის დარღვევა პრეპარატის ფარმაკოკინეტიკაზე მნიშვნელოვან გავლენას არ ახდენს. ღვიძლის ფუნქციის დარღვევის შემთხვევაში ნიფედიპინის კლირენსი დაქვეითებულია. მძიმე დარღვევების დროს აუცილებელია დოზის კორექტირება.
ჩვენება:
- გულის იშემიური დაავადება, ქრონიკული სტაბილური სტენოკარდია (დაძაბვის სტენოკარდია);
- არტერიული ჰიპერტენზია;
- რეინოს დაავადება.
დოზირებისა და მიღების რეჟიმი: 18 წლის შემდეგ, ასევე - სხვაგვარი დანიშნულების არარსებობის შემთხვევაში ადალატი ინიშნება შემდეგი დოზით:
- გულის იშემიური დაავადება - 1 ტაბლეტი (20 მგ) ადალატ შთ დღეში 2-ჯერ. საჭიროების შემთხვევაში შეიძლება დოზის თანდათან გაზრდა მაქსიმუმ 60 მგ-მდე დღეში. თუ პრეპარატი დიდი დოზით არის დანიშნული, მიღება უნდა შეწყდეს თანდათანობით.
- არტერიული ჰიპერტენზია - 1 ტაბლეტი (20 მგ) ადალატ შთ დღეში 2-ჯერ. მკურნალობის ხანრძლივობას ადგენს ექიმი.
- ღვიძლის ფუნქციადარღვეული პაციენტი პრეპარატის მიღების პერიოდში ექიმის მეთვალყურეობის ქვეშ უნდა იყოს. ღვიძლის გამოხატული უკმარისობის შემთხვევაში ნიფედიპინი უნდა დაინიშნოს შემცირებული დოზით.
გვერდითი მოვლენები:
- დაახლოებით 1-10%-ში მოსალოდნელია საერთო სისუსტე, ადვილად დაღლა, ქვედა კიდურების შეშუპება;
- გულ-სისხლძარღვთა სისტემის მხრივ - სახის წამოწითლება, სიცხის შეგრძნება, გახშირებული გულისცემა, პერიფერიული შეშუპება;
- საჭმლის მომნელებელი სისტემის მხრივ - გულისრევა;
- ნერვული სისტემის მხრივ - თავბრუხვევა, თავის ტკივილი.
უკუჩვენება:
- ზემგრძნობელობა ნიფედიპინისა და 1,4-დიჰიდროპირიდინის სხვა წარმოებულების მიმართ;
- მიოკარდიუმის მწვავე ინფარქტიდან პირველი 8 დღე;
- კარდიოვასკულური შოკი;
- რიფამპიცინთან კომბინირება;
- მძიმე აორტული სტენოზი;
- გულის უკმარისობა დეკომპენსაციის ფაზაში;
- ორსულობა და ლაქტაცია.
სიფრთხილით ინიშნება 18 წლამდე და ჰემოდიალიზის დროს.
განსაკუთრებული მითითებები: არტერიული ჰიპერტენზიის (სისტოლური არტერიული წნევა 90 მმ.ვწყ.სვ-ზე დაბალია), თავის ტვინში სისხლის მიმოქცევის მძიმე მოშლის, შაქრიანი დიაბეტის, ღვიძლისა და თირკმლის ფუნქციათა დარღვევის შემთხვევაში პრეპარატი მიღებულ უნდა იქნეს მხოლოდ მკაცრი კლინიკური დაკვირვების პირობებში. ეს ეხება ჰემოდიალიზზე მყოფ ავადმყოფებსაც. ხანგრძლივი მიღების შემთხვევაში არ არის რეკომენდებული ტრანსპორტის ტარება და ტექნიკასთან მუშაობა. სტენოკარდიის შეტევის საპროფილაქტიკოდ მიღების შემთხვევაში გასათვალისწინებელია, რომ არ შეიძლება პრეპარატის ერთბაშად მოხსნა.
სხვა ბეტა-ადრენორეცეპტორულ ბლოკატორებთან ერთად მიღებისას საჭიროა ექიმის მუდმივი მეთვალყურეობა, ვინაიდან მოსალოდნელია არტერიული წნევის მკვეთრი დაქვეითება და გულის უკმარისობის სიმპტომების გაძლიერება. ადალატ ST-ის აქტიური ნივთიერება სინათლისადმი ძალზე მგრძნობიარეა, ამიტომ ტაბლეტების დანაწევრება დაუშვებელია, რათა არ დაირღვეს გარსი, რომელიც პრეპარატს სინათლის ზემოქმედებისგან იცავს.
ზედოზირება: მოსალოდნელია ცნობიერების დარღვევა თვით კომის ჩათვლით, არტერიული წნევის მკვეთრი დაცემა, არითმია, ტაქიკარდია/ბრადიკარდია, ჰიპერგლიკემია, მეტაბოლური აციდოზი, ჰიპოქსია, კარდიოგენული შოკი, ფილტვების შეშუპება. უწინარეს ყოვლისა, უნდა ჩატარდეს ღონისძიებები ნიფედიპინის ორგანიზმიდან გამოსადევნად და ჰემოდინამიკის სტაბილური მაჩვენებლების აღსადგენად. პრეპარატის შემდგომი შეწოვის თვიდან ასაცილებლად რეკომენდებულია კუჭის ამორეცხვა წვრილი ნაწლავის ირიგაციასთან ერთად, ასევე - პლაზმაფერეზი. ჰემოდიალიზის ჩატარება მიზანშეწონილი არ არის, რადგან დიალიზის საშუალებით ნიფედიპინი არ გამოიდევნება. ბრადიკარდიის დროს ნაჩვენებია ასიმპათომიმეტიკებით მკურნალობა, სიცოცხლისათვის სახიფათო ბრადიკარდიის შემთხვევაში კი გულის რიტმის ხელოვნური მმართველის იმპლანტაციასაც მიმართავენ. არტერიული წნევის დაქვეითების შემთხვევაში ნაჩვენებია მკურნალობა კალციუმის შემცველი პრეპარატებით.
სხვა წამლებთან ურთიერთქმედება: არტერიული წნევის დამწევ სხვა პრეპარატებთან კომბინირებულად გამოყენებისას ნიფედიპინის ჰიპოტენზიური ეფექტი შესაძლოა გაძლიერდეს. ბეტა-ადრენობლოკატორებთან ერთად გამოყენებისას ჰიპოტენზიური ეფექტის გაძლიერებასთან ერთად მოსალოდნელია გულის უკმარისობის განვითარება, ამიტომ ადალატ ST-ისა და ბეტა-ადრენობლოკატორების ერთდროული პარენტერალური მიღება არ შეიძლება.
ნიფედიპინი მეტაბოლიზდება ღვიძლსა და კუჭ-ნაწლავის ლორწოვანში. საშუალებები, რომლებიც ამ ფერმენტების ინჰიბირებასა და ინდუცირებას ახდენენ, შინაგანი მიღების შემთხვევაში შესაძლოა ურთიერთქმედებაში შევიდნენ ნიფედიპინთან და ამის გამო დაირღვეს კლირენსი ან ღვიძლში პირველადი გავლის ეფექტი. ნიფედიპინი ამცირებს დიგოქსინის კლირენსს, რაც იწვევს სისხლის პლაზმაში მისი კონცენტრაციის მომატებას, ამიტომ პაციენტს სჭირდება განსაკუთრებული ყურადღება, რათა დროულად იქნეს შემჩნეული დიგოქსინის ზედოზირების სიმპტომები და საჭიროების შემთხვევაში შემცირდეს დოზა. ადალატ ST-ისა და ციმეტიდინის (იშვიათად - რანიტიდინის) ერთდროული გამოყენებისას შესაძლოა სისხლის პლაზმაში ნიფედიპინის დონემ მოიმატოს, რაც გააძლიერებს ჰიპოტენზიურ ეფექტს. ადალატ ST-ისა და ქინიდინის კომბინაცია ზოგჯერ იწვევს სისხლის პლაზმაში ქინიდინის კონცენტრციის კლებას, მაგრამ მისი მიღების შეწყვეტისას სისხლის პლაზმაში ქინიდინის კონცენტრაცია მკვეთრად იმატებს, ამიტომ საჭიროა დოზის კორეგირება. ზოგჯერ იზრდება თვით ნიფედიპინის კონცენტრაცია. ამ შემთხვევაში მისი დოზის შემცირებაა საჭირო. ადალატ ST-ისა და ქინიდინის კომბინაციის შემთხვევაში აუცილებელია, გადამოწმდეს სისხლის პლაზმაში ქინიდინის კონცენტრაცია და არტერიული წნევა. ადალატ ST-ისა და რიფამპიცინის ერთდროული დანიშვნა არ შეიძლება, რადგან ქვეითდება ნიფედიპინის ბიოშეღწევადობა და სისხლის პლაზმაში მისი თერაპიული კონცენტრაცია იკლებს. დილტაიზემი ამცირებს ნიფედიპინის კლირენსს, ამიტომ მათი კომბინაციის შემთხვევაში შესაძლოა საჭირო გახდეს ნიფედიპინის დოზის შემცირება. გრეიპფრუტის წვენის ნიფედიპინთან ერთდროული მიღებისას შესაძლოა შესუსტდეს პრეპარატის თერაპიული ეფექტი არტერიული ჰიპერტენზიის დროს. ციზაპრიდისა და ნიფედიპინის ერთდროული მიღებისას შესაძლოა სისხლის პლაზმაში მოიმატოს ნიფედიპინის კონცენტრაციამ, ამიტომ აუცილებელია არტერიული წნევის კონტროლი და საჭიროების შემთხვევაში - ნიფედიპინის დოზის შემცირება. თავსებადია რენტგენოკონტრასტულ ნივთიერებებთან.
შენახვის პირობები და ვადა: ადალატი ინახება 300C-ზე დაბალ ტემპერატურაზე, ბნელ, მშრალ, ბავშვებისთვის მიუწვდომელ ადგილას. ვარგისია 5 წელი.
