შუილი ყურებში, კოხლეალური ნევრიტი - ოტო–რინო–ლარინგოლოგია

მოგესალმებით,
თქვენთვის განკუთვნილ პასუხში იხილავთ შემდეგ ინფორმაციას:

• ხმაურის გამომწვევი პათოლოგიები;
• რა არის კოხლეალური ნევრიტი;
• კოხლეალური ნევრიტის მკურნალობა.

თქვენს მიერ აღწერილი მოვლენა, ყურში შუილის შეგრძნება, საკმაოდ გავრცელებული პრობლემაა, რომელიც წარმოადგენს ხმაურის სუბექტურ შეგრძნებას, რომელიც არ უკავშირდება გარე სამყაროს ობიექტურ ხმებს.
ვინაიდან სმენითი სისტემა ძალიან მგრძნობიარეა და ადვილად ზიანდება, შუილის მიზეზთა ნუსხა მრავალფეროვანია. ის მოიცავს სხვადასხვა სირთულის პრობლემათა მთელ სპექტრს, გოგირდის საცობითა თუ შუა ყურის რომელიმე პათოლოგიით დაწყებული, აკუსტიკური სიმსივნითა თუ თავის ტვინში სისხლის მიმოქცევის მწვავე მოშლით დამთავრებული.
ხმაურის გამოწვევა შეიძლება განაპირობოს ისეთმა ფაქტორებმა , როგორიცაა:
მაღალი ხმისგან გამოწვეული სმენის დაქვეითება;

• ყურის ინფექციები;
• გულისა და სისხლძარღვების დაავადებები;
• მენიერის დაავადება;
• ტვინის სიმსივნე;
• ჰორმონული ცვლილებები ქალებში;
• ფარისებრი ჯირკვლის პათოლოგიები.

ამიტომ შუილის მიზეზის დადგენა ხშირად ძნელია და არაერთი კვლევის ჩატარებას მოითხოვს.
თუ თქვენს შემთხვევაში, ნამდვილად დადგინდა სმენის ნერვის ნევრიტი, იგივე კოხლეალური ნევრიტი, მას ყველაზე ხშირად იწვევს ზედა სასუნთქი გზების მწვავე რესპირატორული ინფექციები ან ზედა სასუნთქი გზების ანთებითი პროცესები.

ზოგადად კოხლეალური ნევრიტი განკურნებადი არაა, ნივთიერებათა ცვლის გამაუმჯობესებელი და ნერვული ქსოვილის აღმდგენი საშუალებების დახმარებით, შესაძლებელია მდგომარეობის გაუმჯობესება.
შესაბამისად, რაც უფრო ადრე დაიწყებთ სმენის ნერვის ნევრიტის მკურნალობას, მით უფრო მეტია უკეთესი შედეგის მიღწევის შანსი, ვიდრე ნერვის ქსოვილის დაზიანება ჯერ კიდევ შექცევადია.
სავარაუდოდ, ბრძანდებით ემიგრანტი, ამიტომ გირჩევთ, მიმართოთ ქვეყნის ოტო-რინო-ლარინგოლოგსა და ნევროლოგს, სადაც ამჟამად იმყოფებით.

• ანალოგიურ შეკითხვაზე პასუხი შეგიძლიათ იხილოთ ბმულზე: https://kirurgia.ge/shekitxva-eqims/oto%E2%80%93rino%E2%80%93laringologia/28

გმადლობთ, რომ გვენდობით, გისურვებთ ჯანმრთელობას!