კითხვა: მოგესალმებით. დაახლოებით ორი თვის წინ ფეკალურ მასაში შევამჩნიე სისხლი,კუჭის მოქმედების დროს კი ფხაჭვნის შეგრძნება მქონდა და ჩავთვალე რომ რაღაც გაიკაწრა შიგნით და ამის ბრალი იყო.გუშინ საღამოს ანალურ ხვრელთან დისკომფორტს ვგრძნობდი,თუმცა ვერ ვიტყვი რომ მწვავედ მტკიოდა (სხვა დროსაც მქონია მსგავსი შეგრძნება და უნდა აღვნიშნო,რომ ამ დისკოფმორტს ვგრძნობ რაღაც მრგვალ გამონაზარდთან,რომელიც არის ანალურ ხვრელთან და რომელიც ზოგჯერ ხელით მესინჯება,თუმცა ყოველთვის არა_ანუ ყოველთვის არ არის გარეთ) დღეს კი ისევ ფხაჭვნის შეგრძნება მქონდა და ქაღალდზე სისხლის პატარა ლაქაც შევნიშნე. ცოტა მტკივნეული იყო დეფეკაციის პროცესი .რამდენიმე თვის წინ ექოსკოპია გადავიღე საკვერცხეზე და ექოსკოპისტმა მკითხა ბუასილი თუ მაქვს, ალბათ რამე დაინახა ისეთი რაც ამაზე მიუთითებდა. მაგრამ ბუასილს როგორც ვიცი დეფეკაციის შემდეგ ახლავს სისხლდენა,რაც მე არ აღმენიშნება.ქავილი ზოგჯერ, იშვიათად მაქვს, მაგრამ უმნიშვნელოდ და არ ჩავთვალე ყურადღების ღირსად. მჯდომარე ცხოვრების წესით ვცხოვრობ და არც მაინცდამაინც ჯანსაღად ვიკვებები. გუშინ ბევრი პოპკორნი ვჭამე და იქნებ ამის ბრალია:(. ზ ოგჯერ მასაში მუქ ადგილებსაც ვამჩნევ, მუქ ყავისფერს. ბოდიშს გიხდით უხერხული კითხვისთვის. დიდი დრო დამჭირდება ამ პრობლემით ექიმთან რომ მივიდე, ფსიქოლოგიური ფაქტორის გამო. რა თქმა უნდა დიაგნოზის დასმას არ ველი ასე დისტანციურად,მაგრამ მაინტერესებს რა შეიძლება რომ იყოს. მუცლის ტკივილი არ მაქვს, თუმცა შებერილობას ვამჩნევ ხშირად. ბავშვობაში მქონდა კოლიტი,როგორც დედამ მითხრა. მადლობა წინასწარ პასუხისთვის.
პასუხი:
მოგესალმებით,
თქვენი მონათხრობის მიხედვით თუ ვიმსჯელებთ, სიმპტომები ჰგავს ჰემოროიდს ( ბუასილს ) რომელსაც თავადაც ვარაუდობთ.
არ არის აუცილებელი, მას ყოველთვის ერთვოდეს ქავილი, რადგან როგორც წესი, ჰემოროიდის სიმპტომები იმაზეა დამოკიდებული თუ სად მდებარეობს.
● შიდა ბუასილი – როცა ჰემოროიდი სწორ ნაწლავშია. რასაკვირველია, მას ვერ ხედავთ, ან აღიქვამთ მას, როდესაც გარკვეულ დისკომფორტს შეიგრძნობთ, თუმცა კუჭის მოქმედებისას გაღიზიანებისა და დაჭიმვის გამო შეიძლება დაზიანდეს ჰემოროიდის ზედაპირი და გამოვლინდეს სისხლდენა;
● გარე ბუასილი – ჰემოროიდი წარმოდგენილია ანუსის გარშემო კანქვეშ. გაღიზიანების დროს თავს იჩენს ქავილის შეგრძნება ან სისხლდენა;
● თრომბირებული ბუასილი – ზოგჯერ სისხლი გუბდება შიდა ჰემოროიდულ კვანძში და ფორმირდება თრომბად, ამ მდგომარეობისას ვლინდება ძლიერი ტკივილი, შესიება, ანთება და ანუსთან დიდი ზომის კვანძი.
ბუასილის თვითმკურნალობა არ არის გამართლებული. პირველ რიგში აუცილებელია ზუსტი დიაგნოზის დასმა, ვინაიდან შეიძლება გვეგონოს ბუასილი და იყოს მასთან ერთად ან მის გარეშე ნაპრალი.
ერთადერთი, რაც შეგვიძლია გირჩიოთ, სანამ სპეციალისტს მიაკითხავთ, არის ის რომ, აუცილებლად უნდა მოიწესრიგოთ კუჭ-ნაწლავის მოქმედება, ბუასილის სიმპტომების პროვოცირება შეუძლია შეკრულობას, სიმძიმეების აწევას, ალკოჰოლსა და ცხარე საკვების მიღებას.
ბუასილის გამწვავება შესაძლებელია მოჰყვეს ფაღარათსაც.
რასაკვირველია, ისევე როგორც ნებისმიერი დავადების შემთხვევაში, ბუასილის დროსაც სრულფასოვანი მკურნალობის დასანიშნად აუცილებელია ვიზიტი სპეციალისტთან – პროქტოლოგთან, რომელიც განსაზღვრავს მკურნალობის მეთოდს.
თქვენ ჩვენი „ხშირი პაციენტი“ ბრძანდებით, სასიამოვნოა როცა გვენდობიან, თუმცა როგორც თავადაც აღნიშნეთ, დისტანციურად დიაგნოსტირება შეუძლებელია. უნდა მიმართოთ სპეციალისტს – სხვა სამედიცინო დაწესებულებაში ან ჩვენს კლინიკაში. წინააღმდეგ შემთხვევაში, მიმოწერის რეჟიმში რეკომენდაციების მოცემას ვეღარ გავაგრძელებთ.
ქირურგიის ეროვნული ცენტრის სახელით გისურვებთ ჯანმრთელობას !
გამოაგზავნეთ შეკითხვა
