ქირურგიის ეროვნული ცენტრის სამეცნიერო კონფერენცია

10 დეკემბერს, სასტუმრო „თბილისი მარიოტში“ გაიმართა ქირურგიის ეროვნული ცენტრის რიგით მე-6 სამეცნიერო კონგრესი, რომელიც აკადემიკოს კონსტანტინე ერისთავის დაბადებიდან 132–ე, ქირურგიის ეროვნული ცენტრის დაარსებიდან 75-ე წლისთავს და ცენტრში ბირთვული მედიცინის დეპარტამენტის ოფიციალურად გახსნის თარიღს მიეძღვნა. საერთაშორისო სამეცნიერო ღონისძიება მოიცავდა ორ სხვადასხვა კონფერენციას შემდეგი მიმართულების თემებით:

• „ონკოლოგიურ დაავადებათა თანამედროვე დიაგნოსტირებისა და  მკურნალობის მეთოდები“;
• „ათეროსკლეროზისა და ცერებრო–ვასკულური სინდრომების დიაგნოსტირებისა და მკურნალობის პრინციპები“.

გამართული კონგრესის უმთავრესი მიზანი საქართველოში ონკოლოგიური მიმართულების განვითარების ახალ საფეხურზე გადასვლის აღნიშვნა და მისთვის ხელშეწყობა იყო, რომლის საფუძველიც, ქირურგიის ეროვნულ ცენტრში, მაღალკვალიფიციური, პროფესიონალი კადრებით დაკომპლექტებულ ბირთვული მედიცინის დეპარტამენტში, მსოფლიოში პირველი ციფრული პოზიტრონულ-ემისიური კომპიუტერული ტომოგრაფის დაინსტალირება გახდა.

სამეცნიერო კონგრესი კორპორაცია „ავერსის“ დამფუძნებელმა პაატა კურტანიძემ მისასალმებელი სიტყვით გახსნა. ქართული სამედიცინო საზოგადოებისა და ოფიციალური სტრუქტურების წარმომადგენელთა გარდა, ღონისძიებას ესწრებოდნენ თურქეთიდან, ესპანეთიდან და მსოფლიოს სხვა წამყვანი კლინიკებიდან მოწვეული უცხოელი მეცნიერები და ექიმები:

1. პედრო კავადასი, MD, PhD - კავადას კლინიკის დირექტორი, პედრო კავადას ფონდის დამფუძნებელი და მმართველი, ვალენსიის უნივერსიტეტის პროფესორი (ესპანეთი);
2. მაია ჯუღაშვილი, MD, PhD - სხივური ონკოლოგი Genesis Care Spain- ESTRO NSC სამეცნიერო საბჭოს წევრი, მურსიის უნივერსიტეტის პროფესორი (ესპანეთი);
3. ოკტარ ასოღლუ, MD, PhD - კოლორექტალური ქირურგი, სტამბულის საუნივერსიტეტო კლინიკის პროფესორი (თურქეთი);
4. ესკარლატა ლოპესი, MD, PhD - ონკოლოგიის პროფესორი, სხივური ონკოლოგი Genesis Care Spain (ესპანეთი);
5. ხუან ბარსია, MD, PhD - Hospital Clínico San Carlos ნეიროქირურგიის დეპარტამენტის ხელმძღვანელი, მადრიდის კომპლუტენსის უნივერსიტეტის ნეიროქირურგიის კათედრის გამგე (ესპანეთი);   
6. უმუტ ელბოგა - პროფესორი, გაზიანტეპის სახელმწიფო  უნივერსიტეტის ბირთვული მედიცინის კლინიკის ხელმძღვანელი (თურქეთი);
7. იბრაჰიმ ოზსუ - კომპანია „მოლტეკის“ დამფუძნებელი;
8. ხან ზაფერ აქსოი და სალიჰ ადინი - მოლტეკის წარმომადგენლები;
9. ჯო ქევენა - ამერიკული კომპანია „თი ემ დის“ წარმომადგენელი, ელექტას ოფიციალური პარტნიორი;
10. ლილია რიაბინკინა - „ფილიპსის“ მარკეტინგის დირექტორი;
11. კარინა დაშიანი - ევროპის ოფისის ხელმძღვანელი.

კონფერენციის დასასრულს, უცხოელმა კოლეგებმა დამსწრე საზოგადოებას ემოციები და შთაბეჭდილებები გაუზიარეს. მათ აღფრთოვანება ვერ დამალეს ცენტრის ბირთვული მედიცინის დეპარტამენტის დათვალიერებისას, ექიმების, ტექნიკოს-ფიზიკოსების გაცნობისას და პირდაპირ აღნიშნეს, რომ ასეთი დონის ცენტრი, მსოფლიო მასშტაბითაც კი, უიშვიათესია და რომ საქართველოს და სრულიად ამიერკავკასიის რეგიონს ძალიან გაუმართლა. ასევე, საპატიო სტუმრებმა ქირურგიის ეროვნულ ცენტრთან მჭიდრო თანამშრომლობისა და მომავალში საკუთარი გამოცდილების გაზიარების მზაობა გამოთქვეს.

ქირურგიის ეროვნული ცენტრი გისურვებთ ჯანმრთელობას!