პეტ-კტ დაგეგმარების როლი ონკოპაციენტთა მკურნალობაში

ქირურგიის ეროვნული ცენტრის რადიოთერაპიის დეპარტამენტს მომართა შუახნის მამაკაცმა დიაგნოზით - პირ-ხახის ავთვისებიანი სიმსივნე, მეტასტაზით კისრის ლიმფურ კვანძში, მარჯვნივ. კლინიკური ონკოლოგის მიერ ნაგულისხმევი იყო ჩვენს ცენტრში ქიმიოთერაპიისა და რადიოთერაპიის მეთოდით მკურნალობა.

ჩატარებული კისრისა და გულმკერდის კტ კვლევით გამოვლინდა მარჯვნივ მრავლობითი, მეტი ალბათობით დაზიანებული სტრუქტურის კისრის ლიმფური კვანძები, მაქსიმალური ზომით მარჯვნივ, ნიკაპქვეშა კოლექტორში 29 მმ-მდე, მარჯვნივ, კაროტიდულ კოლექტორში კი, 28 მმ-მდე. ამას გარდა, გულმკერდის სეგმენტში, ფილტვის ზემო წილში, გამოისახა 5 მმ-მდე ზომის არასპეციფიკური კვანძოვანი კერა, რომელიც საჭიროებდა დინამიკაში დაკვირვებას.

რადიოთერაპიაში დასასხივებელი სამიზნის (კიბოს უჯრედების) მოცულობის შერჩევისა და განსაზღვრისათვის გამოიყენება სტანდარტული ანატომიური კტ დაგეგმარების გამოსახულებები. სამედიცინო პრაქტიკა კი, გვიჩვენებს, რომ პოზიტრონულ-ემისიური (პეტ-კტ) დაგეგმარების გამოსახულებების მიხედვით, სამიზნე არეალის მოცულობა შეიძლება, შემცირდეს, ან გაიზარდოს, რაც საფუძველია ზუსტი და მაღალი ხარისხის მკურნალობისა.

ამიტომ, ტრადიციული კტ დაგეგმარების ნაცვლად, ჩვენი ცენტრის რადიოთერაპიისა და ბირთვული მედიცინის სპეციალისტებმა ჩაატარეს პეტ-კტ დაგეგმარება საიმობილიზაციო საშუალებით, თერმოპლასტიკური ნიღბისა და ლაპ-ლაზერების გამოყენებით.

დაგეგმარების შედეგად მიღებულ გამოსახულებებზე, ფილტვებში, ორმხრივად გამოვლინდა მცირე ზომის მეტასტაზური დაზიანება. შედეგად, პოზიტრონულ-ემისიური ტომოგრაფის მეშვეობით, შეიცვალა და კიდევ უფრო ზუსტად განისაზღვრა პაციენტის მკურნალობის ტაქტიკა. საბოლოოდ, იგი გადამისამართებულ იქნა ონკოლოგთან სისტემური მკურნალობის ჩასატარებლად. ამის შემდეგ კი, საკონტროლო კვლევების საფუძველზე, კვლავ განიხილება სხივური თერაპიის საკითხი.

შეგახსენებთ, ბირთვული მედიცინის დეპარტამენტი აღჭურვილია საქართველოში ერთადერთი ციფრული პოზიტრონულ-ემისიური კომპიუტერული-ტომოგრაფით (PHILIPS VEREOS DIGITAL PET/CT), რომლის დამსახურებითაც კიბოს ადრეულ სტადიაზე აღმოჩენა და დამარცხება უკვე შესაძლებელია.

ქირურგიის ეროვნული ცენტრის ბირთვული მედიცინის დეპარტამენტთან დასაკავშირებლად, დაგვირეკეთ ნომერზე (032) 2 02 25 25!

გისურვებთ ჯანმრთელობას!