დროული და მაღალტექნოლოგიური ჩარევის პირობებში ახალგაზრდა ქალი ინსულტისგან განიკურნა

ქირურგიის ეროვნულ ცენტრში შემოიყვანეს ახალგაზრდა ქალბატონი შემდეგი კლინიკური ნიშნებით:

• მარცხენა ხელსა და ფეხში ძალის დაქვეითება (პლეგია);
• მეტყველების მკვეთრი გაძნელება;
• სახის ასიმეტრია.

კლინიკის გადაუდებელი სამედიცინო დახმარების დეპარტამენტში, ინსტრუმენტულ-ლაბორატორიული კვლევებით დადგინდა მარჯვენა შიგნითა საძილე არტერიის სრული დახშობა (ოკლუზია).

შესაბიმისი კრიტერიუმების დაცვით პაციენტს ჩაუტარდა თრომბოლიზისი (სპეციალური პრეპარატის გადასხმის შედეგად  თრომბის დაშლა). ამის შემდეგ პაციენტი გადაიყვანეს ანგიოგრაფიულ საოპერაციოში და დამატებით, თრომბის სრული ევაკუაციის მიზნით, ჩაუტარდა ნეიროინტერვენცია, თრომბექტომია.

ეს შემთხვევა საინტერესო იყო იმ თვალსაზრისით, რომ პაციენტს აღენიშნა შიგნითა საძილე არტერიის სტენოზი და თრომბოზი კომბინაციაში. ნეიროინტერვენციის შედეგად გაიხსნა დახშული სისხლძარღვები და აღდგა თავის ტვინში სისხლის მიწოდება.

ინსულტმა, არასწორი მართვის შემთხვევაში, შეიძლება გამოიწვიოს უუნარობა ან დასრულდეს ფატალური შედეგით. იმ შემთხვევაში კი, როდესაც პაციენტი დროულად მიმართავს  სამედიცინო დაწესებულებას  და ამავდროულად სწორად შეარჩევს  კლინიკას, რომელსაც აქვს ისეთი ფართო შესაძლებლობები, როგორიც ქირურგიის ეროვნულ ცენტრს, ინსულტი უკვე განაჩენი აღარაა! სწორედ ამას ადასტურებს აღნიშნული პაციენტის შემთხვევა.

ამ დროისთვის პაციენტის მდგომარეობა დამაკმაყოფილებელია. არ აღენიშნება ნევროლოგიური დეფიციტი, გადაადგილდება დამოუკიდებლად. ოპერაციიდან დაახლოებით ოთხ დღეში გაეწერება კლინიკიდან და დაუბრუნდება ცხოვრების ჩვეულ რიტმს.

გისურვებთ ჯანმრთელობას!