სპინალური სტენოზი და მისი კლინიკური გამოვლინება

სტატიაში გაეცნობით შემდეგ ინფორმაციას:

• რა არის სპინალური სტენოზი;
• დაავადების სიმპტომები;
• სტენოზის კლინიკური შემთხვევა;
• ნევროლოგიური დეფიციტის მკურნალობა.

სპინალური სტენოზი

ეს არის ხერხემლის არხის შევიწროება, რომელიც ზურგის ტვინზე ან პერიფერიულ ნერვებზე ზეწოლას იწვევს.

აღსანიშნავია ის, რომ დაავადების საწყის ეტაპზე პაციენტს შესაძლოა ჩივილები საერთოდ არ ჰქონდეს, შორსწასულ შემთხვევაში კი, საჭიროებს ქირურგიულ ჩარევას, რის გამოც ნევროლოგთან დროული ვიზიტი საკმაოდ  მნიშვნელოვანია.

პათოლოგია შეიძლება იყოს შეძენილი ან თანდაყოლილი. მისი განვითარების ყველაზე გავრცელებული მიზეზებია:

• ოსტეოართრიტი;
• ოსტეოქონდროზი;
• სპონდილოზი;
• პეჯეტის დაავადება;
• მაანკილოზებელი სპონდილიტი (ბეხტერევის დაავადება).

სპინალური სტენოზის სიმპტომები

პათოლოგიის დროს კლინიკურად ვლინდება ისეთი სიმპტომები, როგორიცაა:  

• ტკივილი  დაზიანებული ნერვის საპროექციო არეში, რომელიც ძლიერდება მოძრაობის დროს (საჯდომი ნერვის, ბარძაყის ნერვის და ა.შ.);
• სისუსტე კიდურში;
• დაქვეითებული რეფლექსები დაზიანებული ნერვის ფესვის ინერვაციის არეში (ჰიპორეფლექსია);
• შარდის ბუშტის, ნაწლავებისა და სასქესო ორგანოების დისფუნქცია;
•  კუნთოვანი ტონუსის შეცვლა. 

პათოლოგია, ძირითადად, 50 წელს გადაცილებულ პაციენტებში გვხვდება.

სწორედ ამ პათოლოგიის ერთ-ერთ შემთხვევას გაგვაცნობს  ქირურგიის ეროვნული ცენტრის ნევროლოგი თეა შუბლაძე.

კლინიკური შემთხვევ

51 წლის პაციენტმა მოგვმართა ჩივილებით:  სისუსტე და დაბუჟება მარცხენა ხელში, მოტორული დისფუნქცია მარცხენა ქვემო კიდურში, სიარულის გაძნელება, წელისა და კისრის ტკივილი. მისი თქმით, ჩივილები დაეწყო 1 წლის წინ, თავდაპირველად დაუბუჟდა მარცხენა ზედა კიდური, მოგვიანებით, რამდენიმე თვეში კი, თანდათანობით აღენიშნებოდა ძალის დაქვეითება ფეხში. დაუქვეითდა შრომისუნარიანობა, უჭირდა გადაადგილება. ასევე,  პერიოდულად გამოიხატებოდა წელის მიდამოს ტკივილი.ზემოთ აღნიშნული ჩივილების გამო მიმართა ნევროლოგ თეა შუბლაძეს.

ანამნეზური მონაცემების შეკრებისა და ნევროლოგიური სტატუსის შეფასების  შემდეგ პაციენტს „ქირურგიის ეროვნულ ცენტრში“ ჩაუტარდა ხერხემლის მთლიანი სვეტის მაგნიტურ-რეზონანსული ტომოგრაფია. ამ მეთოდს ენიჭება უპირატესობა, რადგანაც ამ კვლევის დროს არ გამოიყენება მაიონიზირებელი რადიაცია და იგი უზრუნველყოფს რბილი ქსოვილების, ზურგის ტვინისა და სპინალური არხის უკეთეს ვიზუალიზებას.

ჩატარებული MRI კვლევის შედეგად გამოვლინდა სპონდილოზი. C3, C4, C5 დისკის ცირკულარული პროტრუზია (4 მმ-მდე), ნევრალური არხების ორმხრივი სტენოზი C2 დისკის დონეზე, ინტრამედიალურად მიელოპათია; L1, L2, L3, L4, L5 დისკების ცირკულური პროტრუზია ნევრალური არხების ბილატერალური სტენოზით. ასევე, შერეული, კომბინირებული სპინალური სტენოზი L4 დისკის დონეზე.

დაძლეული ნევროლოგიური დეფიციტი

პაციენტს დაენიშნა სათანადო კონსერვატიული მკურნალობა, რის შედეგადაც მდგომარეობა საგრძნობლად გაუმჯობესდა. მკურნალობიდან თვენახევარში პაციენტმა განმეორებით გაიარა ნევროლოგის კონსულტაცია, რომლის დროსაც სპინალური სტენოზის ნიშნები აღარ ფიქსირდებოდა.

ამ ეტაპზე მისი მდგომარეობა დამაკმაყოფილებელია, სრულად აღდგა ძალა ქვემო კიდურებში, ალაგდა დაბუჟება და ტკივილი ხერხემლის არეში. რაც მთავარია, სიარულის დროს აღარ გამოიხატება ფეხის სისუსტე.

წარმოდგენილი კლინიკური შემთხვევა ცხადყოფს, რომ პაციენტის დროული დიაგნოსტირება და კვალიფიციური სპეციალისტის მიერ სწორად დანიშნული მკურნალობა, მძიმე დაავადების შემთხვევაშიც კი, წარმატების საწინდარია.

გისურვებთ ჯანმრთელობას!