რა არის იმუნოგლობულინი და როგორ მკურნალობენ მის დეფიციტს ქირურგიის ეროვნულ ცენტრში

ინტერვიუში გაეცნობით შემდეგ ინფორმაციას:

• რა არის იმუნოგლობულინი;
• იმუნოგლობულინური ფუნქცია;
• რა იწვევს მის დეფიციტს;
• ქირურგიის ეროვნული ცენტრის ნევროლოგიური დეპარტამენტის ექსკლუზიური შესაძლებლობები;
• იშვიათი პათოლოგიის მართვა.

იმუნოგლობულინი ანტისხეულია, რომელსაც ადამიანის იმუნური სისტემა გამოიმუშავებს, ანტისხეული კი, ცილაა რომელიც პლაზმური უჯრედების მიერ სხვადასხვა ანტიგენის საპასუხოდ გამოიყოფა. მისი მთავარი ფუნქციაა ხანგრძლივი იმუნიტეტის ჩამოყალიბება, იგი ერთადერთია, რომელიც პლაცენტის გავლით აღწევს ნაყოფში, და მართალია, პასიურად, მაგრამ უზრუნველყოფს მის იმუნიტეტს.

გვესაუბრება ქირურგიის ეროვნული ცენტრის ნევროლოგი თათული გუბელაძე.

- რა არის იმუნოგლობულინი?

- ეს არის ცილების ჯგუფი სისხლის პლაზმაში, რომლებიც წარმოიქმნება ორგანიზმში ანტიგენის შეყვანის საპასუხოდ. იმუნოგლობულინები ძირითადად მონაწილეობენ მეორად იმუნურ პასუხში.

- რა ფუნქცია აქვს იმუნოგლობულინს ადამიანის ორგანიზმში?

- ანტისხეულები აქტიური უბნებით უკავშირდებიან ბაქტერიებს ან ვირუსებს და ეწინააღმდეგებიან მათ გამრავლებას, ან ანეიტრალებენ მათ მიერ გამოყოფილ ტოქსიკურ ნივთიერებს. სისხლში მათი არსებობა კი, გამომწვევის საწინააღმდეგოდ, ორგანიზმის ანტიგენთან ურთიერთქმედებაზე მეტყველებს.

- რა შეიძლება გამოიწვიოს იმუნოგლობულინურმა დეფიციტმა?

- როგორც უკვე მოგახსენეთ, Ig ანტისხეულები მნიშვნელოვან როლს ასრულებენ მეორეხარისხოვან იმუნურ პასუხში, შესაბამისად, ორგანიზმში მისი დეფიციტი იწვევს რიგი დაავადებების პროგრესირებას, მათ შორისაა ისეთიც, რომელიც შესაძლოა, სავალალო შედეგებით დასრულდეს.

– რას გვეტყვით ჩვენს კლინიკაში მომხდარ იშვიათ შემთხვევაზე?

– პაციენტის ოჯახის წევრების გადმოცემით, სხვა კლინიკაში ჩატარებული მკურნალობის შემდეგ მდგომარეობის გაუარესების გამო მან მიმართა თურქეთის რესპუბლიკის ერთ-ერთ სამედიცინო დაწესებულებას. თურქეთში ჩატარებული ელექტრონეირომიოგრაფიის მიხედვით, ქერქული პასუხის ინტენსივობა ორივე წვივში სომატოსენსორულად აღმოცენებული პოტენციალის (კანის ტაქტილური, ანუ შეგრძნებითი რეცეპტორები, რომელთაც აქვს დამცველობითი ფუნქცია და  ტვინს აწვდის ინფორმაციას გამღიზიანებლის, ანუ ტკივილის გამომწვევის შესახებ) მიმართ ნორმალური იყო, მათი ამპლიტუდა კი – დაბალი.

კლინიკაში შემოსვლისას პაციენტის მდგომარეობა იყო მწვავე. იგი უჩიოდა სისუსტეს ორივე ქვემო კიდურსა და ტერფებში.

ქირურგიის ეროვნულ ცენტრში შემოსვლისას ქვემო კიდურებში დიდი წვივის ნერვისა და, განსაკუთრებით, მცირე წვივის ნერვის ბილატერალური მოტორული პასუხი ვერ იქნა დადასტურებული, დისტალურ კუნთებში ფიქსირდებოდა ტოტალური დენერვაცია (ნერვის სრული უფუნქციობა).

ამასთან,  ხანგრძლივი მოტორული პოტენციალები აღინიშნებოდა ნაწილობრივი დენერვაციის მქონე კუნთებში, ხოლო გავრცელებული დენერვაციული პოტენციალები შეინიშნებოდა ყველა კუნთში.

– როგორ მიმდინარეობდა იმუნოგლობულინური დეფიციტის მართვა?

– ვლინდებოდა ძალის დეფიციტი ქვემო კიდურებში, დაქვეითებული იყო მუხლის მყეს-ძვალთა რეფლექსები. შედეგად, პროტოკოლის თანახმად, პაციენტს დაეწყო ადამიანის  იმუნოგლობულინის (ოქტაგამი) ინტრავენური ინფუზია.

პარალელურად, მიმდინარეობდა კრეატინინის და ელექტროლიტების მონიტორინგი და კორექცია.

ჩვენს კლინიკაში 5-დღიანი ინტენსიური მკურნალობის ფონზე პაციენტის ზოგადი მდგომარეობა გაუმჯობესდა, მოიმატა მოძრაობის და მგრძნობელობის ამპლიტუდამ, რომელიც მანამდე მკვეთრად დაქვეითებული იყო.

ჰემოდინამიკური მაჩვენებლების ნორმის ფარგლებში სტაბილიზირების შემდეგ, სათანადო რეკომენდაციებით, ყოველგვარი ნევროლოგიური დეფიციტის გარეშე პაციენტი გაეწერა ბინაზე.

კონკრეტულ შემთხვევაში დაავადებაზე გამარჯვებას საფუძვლად უდევს თანამედროვე  მედიცინის მიღწევების სწორად, დროულად და ეფექტურად გამოყენება მაღალკვალიფიციური პროფესიონალების მიერ მედიცინისა და მეცნიერების თანამედროვე შესაბამისი სტანდარტების მიხედვით.

გისურვებთ ჯანმრთელობას!